Muggsopp - kor farleg er det eigentleg?
Lars Haugen Aardal ser nærmare på muggsopp i mikroskopet på SmaksLab hjå ViteMeir.
Nokre matvarer blir fortare dårlege enn andre. Mateksperten hjå ViteMeir fortel kva du bør tenkje på.
– Det finst matvarer som aktivt brukar muggsopp for å gje den rette smaken. Døme på dette er soyasaus, blåmuggost, kimchi eller brøddeig, seier matekspert hjå ViteMeir, Lars Haugen Aardal.
– I dei fleste andre matvarer er muggsopp uønskt og eit teikn på at produktet begynner å bli dårleg.
Stor variasjon i sopp
Variasjonen i muggsoppen kan samanliknast med "vanleg” sopp. Nokre gjev veldig god smak, medan andre ønskjer me for all del å unngå.
Lars fortel at hovudregelen er at faste matvarer med lågt vassinnhald toler muggsopp betre enn mjuke matvarer.
– Med gulrøter og andre typar faste grønsaker, så kan du kutte vekk den delen som er mygla og bruke resten.
Mykotoksinar
– Matvarer som har høgare vassinnhald er gjerne mjukare i konsistensen. Her skal du kaste det som er dårleg, altså der du kan sjå synleg muggsopp. Dette gjeld mellom anna frukt og bær.
I nokre typar mat, sånn som kjøt og fisk, brød, ris og pasta, produserer muggsoppen såkalla mykotoksinar. Desse kan vere farlege for menneske og dyr, så her oppfordrar mateksperten om å vere litt ekstra forsiktig.
Les også: Kan eg ete ris frå dagen før?
Sjå, lukt, smak!
Visste du at nesten 50 % av all maten me kastar i Sogn kunne vore eten? Ein god regel er å sjå, lukte og smake på maten før ein bestemmer seg for å kaste.
– Ver fornuftig. Viss det er litt overflateflekkar med mugg, så går det fint an å ete utan å bli dårleg. Men det er kanskje ikkje noko du serverer til gjestane dine, avsluttar Lars.
Få fleire matreddartips frå SIMAS.
